الشاعر ازهري محمد علي
يسال عن حميد
مشتاقين
حبيب القلب ياااطيب
اراضيك وين
امس ماقدرت امسي عليك
ولا مساني من طيب الأغاني حنين
سنين مرت
عجاف بي الحسرة
ماخلت وراها سنين
ورغم قساوة الفرقةوعذاب البين
رزاز في روحى حسيتك
مسكتك وانزويت شارعين
ودسيتك
من الشك الملاني يقين
برأي في سري غنيتك
رميت الهم علي
ضهر الغناء المسكين
وكان ياريتني ياااريتك
قريت الخطوة يوم ماشين
مشوار الهوي الودرني
يوم فترني بي امشي
وتعال بعدين
وكيف دودرني لي
قلب الحبيبة كمين
فتح في ضحكتا الوردة
وغرس في خصرها السكين
وباع سر الرحيق للسابلة
واسراب النحل بي الدين
سجد جوه الحنايا وثن
واهتزت مشاعر الطين
لفظ بحر الخطايا وطن
بين قوسين
وطن مفصول شمال ويمين
واتبدد حلمنا سدي
حتل جرح النزوح في الروح
فما ضرا الخلايا اذن
ولافضل في إيدك هين
شأن تزرف دموعك طن
علي الزمن البكيتو ضنين
وذدتا على العليك وهن
ذدنا على العلينا شرود
دخلنا مغارة التنين
نباصر والبصيرة كفيفة
رقد كلب أب زهانة سمين
رقد خلي السعية ضعيفة
والحبل العليها متين
وايد كلب أب زهانة خفيفة
تغيب ذي الشمس وتبين
وماك طالبنا بي اسم الخليفة حليفة
لابتسالنا يوم الدين
عن البحر الممدد جيفة
فقدناك والمغارة ضلمة
ونحن على ضهب ماشين
قطيع من رجرجة وهتيفة
شعراء ومخبرين وهلما
جرينا وراء الزبدجرفتنا
هضاريب الشعر و الحمي
وقفنا على طرف قبرك
قرينا على عجل ياسين
وعاودنا الحنين من ثمة
لمحناك في اللحد صاحي
ونحن على مسد نايمين
كتار لكن براك اكتر
براك فوق المدائن امة
ياعادي و بسيط واسمر
بنسال عن عناوينك
نلم القدرة كان نقدر
نقيل في بساتينك
نورق حسك الاخضر
نفرق لو سمح وكتك
تعال قول لينا بالاكتر
تعال قول لينا مشتاقين
حبيب القلب يا طيب
اراضيك وين
ليست هناك تعليقات:
إرسال تعليق
شاركنا تعليقك أو تحليلك اسفل الموضوع