بالكلاكلة القبة شمال محطة نوباتيا غرب النالة حصلت قصة محزنة

من أنتم يا أطفال مدرسة الكلاكلة القبة إن لم تكونوا سودانيين؟ في مدرسة بالكلاكلة القبة شمال محطة نوباتيا غرب النالة حصلت قصة محزنة واترتب عليها موقف عظيم خلاني أصفق للطلاب ديل . إتوفى غفير المدرسة الفقير إلى الله( عوض ) والكان بيحرس المدرسة وساكن فيها هو وزوجتو وولدو ، عوض دا زول طيب جداا وبيحب الناس وبيساعد بدون ماتطلب منو ، دايما مبتسم برغم الفقر ، الإدارة والأساتذة قرروا إنو تظل الأسرة في نفس السكن والمرتب بتاع المرحوم يمش لي اولادو عادي ، اتخيلوا الطلاب الحزنوا جدا على موت عم عوض عملوا شنو ؟! اجتمعوا براهم تحت نيمة في المدرسة واتكلموا بي همس شديد الاساتذة ماعرفوا الطلاب ديل كانوا بيقولوا شنو ، وانفض الاجتماع تاني يوم بعد الحصص انتهت ظل الطلاب في المدرسة وكلموا واحد من الاساتذة انو هم لموا قروش من أهلن لي أسرة عم عوض المرحوم الرجل الطيب وانو المبلغ دا عاوزين استاذ يسلموا إمام المسجد الجم المدرسة ، بعد صلاة العصر وطلاب المدرسة حضور بلبس المدرسة وقف إمام المسجد متحدثا ومترحما على العم عوض وانو زي ما اساتذة المدرسة وادارتا الاتنين اتبرعوا لي أسرة المرحوم برضو الطلاب القاعدين من الصباح بي لبس المدرسة ديل قرروا يجمعوا قروش من أهلهم والأهل ماقصروا ، الغريب إنو في طالب فقير جدا كان مفقود ماحضر لأنو مالقى قروش عند أهلو فجاب كيس فيهو دقيق قمح وقال لي إمام المسجد أبوي قال لي دي برضو بتنفع مساعدة ياولدي لأنو ماعندنا قروش الإمام بكى بسبب كيس الدقيق (مدرسة الإيثار بالنفس في أحلك الظروف) ، بكا كتير من المصلين لأنو هزاهم موقف الطلاب الأطفال ديل ، ديل مش دخلوا مدرسة علوم ، دي مدرسة أخلاق ، علمونا فن المساعدة والحب للناس والرحمة ، مافي مجتمع متآزر ممكن تلقاهو في حياتك زي مجتمع السودان ، ديل أهلي وبفخر بيهم وبي المدرسين والمدرسات القروهم وبي اهلهم الربوهم على المحبة وبي إدارة المدرسة القررت يستمر مرتب المرحوم زي ماهو وتظل الأسرة في نفس السكن جوى المدرسة شكرا ليكم وللدروس والانتعاش العظيم العملتوهو لي روحنا المتعبة ياطلاب المدرسة ، شكرا ياسودانيين برغم الفقر والجوع والفساد والسرقة من التماسيح والسلطة لكن يظل شعبك طاهر ونضيف ونقي ووالله كلمة أنا سوداني دي مسؤولية (أطفال بي روح ناس كبار واعين) أدوني أمل في جيل جديد مافيهو الأنانية واللامسؤولية نعشق ناسك وأرضك وطيرك والكون دا بلاك ضيق ومسيخ ست شاي وجلست عصري ونيل حبوبة بتحكي عن التاريخ جغمة أخيرة : دخلتو سارقي قوت الشعب مدرسة ،، فهل يمكن أن يحرك هذا المنشور ضمير اللصوص ؟ كل الحب لي أي زول بيربي اطفالو على حب الناس والرحمة لأنو الرحمة هي الإنسانية في أرقى صورا ، أنا سوداني ارجووووو من قوات الشرطة الاهتمام باسرة المرحوم