سوق أمدرمان هذا السوق العريق

سوق أمدرمان هذا السوق العريق الذي يضم كل ماهو قديم و يحمل كل رائحة و عبق الماضي ومصدر سعاده وفخر لأي شخص أمدرماني تلك الشوارع القديمة والدكاكين العتيقه في شوارعه وأزقته مثل شارع الصاغه والعدني وأبومرين وزقاق العناقريب وسوق الزنك و البوتيكات الحديثه للملابس والجزم و إحتياجات المواليد وادوات التجميل والكريمات زقاق البنك الألعاب والمكتبات البوسته وووووكل شئ المحزن هو اختناق تلك الشوارع الضيقه بالعربيات والركشات و الدفارات يوم كامل وانا احاول الوصول لإحدى المحلات بداخل أحدي سيارات الاجره لشراء بعض احتياجاتي خوفاً مني بسبب الزحمه وطبعاً لن أنسى ان اخبركم سعر المشوار من المهندسين لي هناك الذي بلغ مبلغ الفين جنيه أو ألف ونص طبعاَ كل واحد فيهم بيشطح حسب فهمو ونظرتو للشخص لو حتركب ركشه بنصحك امشي مبهدل وطبعا ماكلهم فيهم اولاد حلال صادفوني اما ترحال سعر المشوار الف وخمسين جنيه والسبب طبع ارتافع سعر المحروقات، المحزن طول الوقت قضيتو وانا بحاول الوصول للمحل مع الزحمه والكتمه ديك وعدم النظام و مشاكل الناس السايق عربيه والسايق كارو وياخ مالك زح مابزح الشارع حقي ودخلني احسن ليك وانت قايل نفسك شنو وضربت لي الرفرف🤪

المهم وصلته دايخه بعد قضيت ساعه ونصف في الطريق برغم قرب المسافه طبعاَ ماقدرت اتذكر حتى الحاجات العايزاها كلها كانت شنو نزلت واتصدمت من كميه الأوساخ ومياه غسيل العربيات او مامعروف مصدرها 😷 لدرجه راكضه وفي باب المحل بالضبط كان في عتبتين مصنوعين من تراب أو اسمنت مشقق اكل عليهم الدهر وشرب مكسرين وتقريباً كل النظام في الشارع ده كده ماعدا دكاكين بسيطة وقعت وقعه على رجلي بي قعده في الأرض كيف ماعارفه لقيت نفسي في الأرض لكن الحمد لله جات في الرجل اليمين رضوخ ورضوض وياساتر ياساتر اتذكرت اني نسيت دعاء دخول السوق والتحصين مهم ياجماعه ولولا أصرار أحدي الباعه المتجولين على اني اشتري منو وهو ما اشتغل عز السخانه ديك و اني جبرته بي خاطرو كمساهمة بدون ما اشوف هو ببيع شنو الحاجه دي نجتني من كسر مؤكد عرفت وقتها انو ربنا رسلو لي

اجبرو خاطر اي شخص ربما تكون المنجية ، الحمد لله الحمد لله الرفع عني وجات خفيفه طبعاً كرهت اليوم الفكرت اجيب فيه حاجه وبي دربي داك عملت للخلف در ورجعته خسرانه ثمن المشوار بس كسبت سلامة عضمي رسالتي لي تجار سوق أمدرمان اعملو نفير صلحو السوق ده اصلاَ كل الإصلاحات التمت بعد الثوره مبنية على المبادرات والدعم الذاتي اتكلمو مع ناس المحليه او اعملو لجنة تهتم ليكم بنظام ونظافه السوق ورصف الطرق سوق زي ده بره بيكون معلم سياحي مهم لانو فيه كل تراثنا وثقافتنا وموروثاتنا شجعو السياحة في البلد ماتطفشو الناس لانو عنصر الإبهار بيكون في بعض التفاصيل المهمة ولازم تعملوها من نضافه لي واجهات جميله مراوح رش وتنظيم وأهم حاجه تصلحو لينا عتباتكم دي و تبت توبه من مشى السوق و العتبه البتخليك تقع وردلب تقرب تقلب الهوبه 😁

#قناة_الشعب_عزه